یروشلم: اسرائیلی فوج کے مطابق غزہ شہر سے اب تک ڈھائی لاکھ سے زائد افراد نقل مکانی کرچکے ہیں، تاہم فلسطینی حکام کا کہنا ہے کہ اصل تعداد اس سے کہیں کم ہے کیونکہ جنوبی علاقوں میں گنجائش نہ ہونے کے باعث زیادہ تر شہری منتقل نہیں ہو پائے۔
اقوام متحدہ نے گزشتہ ماہ کے اختتام پر تخمینہ لگایا تھا کہ غزہ کے سب سے بڑے شہری مرکز اور اس کے نواح میں تقریباً دس لاکھ فلسطینی موجود ہیں، جہاں طویل محاصرے اور بمباری کے نتیجے میں قحط جیسی صورتحال جنم لے رہی ہے۔
اسرائیلی فوجی ترجمان اویخائے ادرعی نے دعویٰ کیا کہ “اب تک ڈھائی لاکھ سے زائد افراد اپنی حفاظت کے لیے شہر چھوڑ چکے ہیں۔” تاہم غزہ کی سول ڈیفنس ایجنسی کے مطابق اصل تعداد صرف 70 ہزار کے قریب ہے۔
اسی دوران اسرائیلی وزیراعظم بنیامین نیتن یاہو نے کہا کہ جب تک حماس کی قیادت ختم نہیں کی جاتی، غزہ میں امن ممکن نہیں۔ ان کے مطابق قطر میں موجود حماس رہنما عوام کی مشکلات کو نظرانداز کرتے ہوئے جنگ کو طول دینے کے لیے جنگ بندی کی کوششوں کو سبوتاژ کر رہے ہیں۔
دوسری جانب امریکی سینیئر سفارتکار مارکو روبیو نے واضح کیا کہ قطر میں اسرائیلی حملے کے باوجود امریکا اور اسرائیل کے تعلقات متاثر نہیں ہوں گے، تاہم اس کے ممکنہ اثرات پر بات ضرور کی جائے گی تاکہ غزہ میں جنگ بندی کے لیے کوششیں جاری رہیں۔
