عمران خان کا بیان: اسٹیبلشمنٹ اور پی ٹی آئی ملک و قوم کی ضرورت ہیں

راولپنڈی: پاکستان تحریک انصاف کے بانی اور سابق وزیراعظم عمران خان نے کہا ہے کہ اسٹیبلشمنٹ اور پی ٹی آئی دونوں کی موجودگی اس وقت ملک اور عوام کے لیے ناگزیر ہو چکی ہے۔ یہ بات ایڈووکیٹ فیصل چوہدری نے اڈیالہ جیل میں عمران خان سے ملاقات کے بعد میڈیا سے گفتگو کرتے ہوئے بتائی۔
فیصل چوہدری نے بتایا کہ عمران خان کی صحت بہتر ہے، تاہم انہیں آگاہ کیا گیا کہ ان کی بہنوں کو ملاقات کی اجازت نہیں دی گئی اور دیگر پارٹی رہنماؤں اور وکلاء کو بھی روکا گیا۔ صرف دو افراد ہی جیل تک پہنچ سکے۔
ملاقات میں قانونی اور سیاسی امور پر تبادلہ خیال ہوا، اور عمران خان نے 26ویں آئینی ترمیم کے بعد پیدا ہونے والی صورتحال پر تشویش کا اظہار کرتے ہوئے کہا کہ اس پر پارٹی کی قانونی کمیٹی اور قیادت چیف جسٹس کو خط لکھے گی۔
انہوں نے کہا کہ ان کے کیسز عدالت میں نہیں لگائے جا رہے، بشریٰ بی بی کے ساتھ بھی ناروا سلوک کیا جا رہا ہے۔ عمران خان نے مائنز اینڈ منرلز بل کو متنازع قرار دیتے ہوئے کہا کہ اس حوالے سے خیبر پختونخوا کی قیادت انہیں بریفنگ دے، اور عوام کو اعتماد میں لیا جائے۔
افغانستان کے معاملے پر ان کا کہنا تھا کہ مذاکرات کی ضرورت پہلے دن سے تھی، لیکن حکومت نے وقت ضائع کیا جس کے نتیجے میں قیمتی جانوں کا نقصان ہوا۔ انہوں نے کہا کہ سرمایہ کاری اسی وقت آئے گی جب ملک میں قانون کی حکمرانی بحال ہو۔
انہوں نے شکوہ کیا کہ اب ان کی فیملی کو بھی ملاقات کا حق نہیں دیا جا رہا، جبکہ ماضی میں ایک وقت میں 9،9 وکلاء ان سے ملاقات کر چکے ہیں۔