عظمیٰ بخاری: 9 مئی کے حملے میں ملوث افراد کسی معافی کے مستحق نہیں

لاہور: پنجاب کی وزیر اطلاعات عظمیٰ بخاری نے علیمہ خان کے بیٹے شاہ ریز کی گرفتاری پر ردعمل دیتے ہوئے کہا ہے کہ 9 مئی کے حملے میں ملوث افراد کسی معافی کے مستحق نہیں ہیں۔
عظمیٰ بخاری نے بیان میں کہا کہ 9 مئی کی کوشش ناکام بغاوت تھی اور اس کے تمام شواہد سامنے آ چکے ہیں۔ ناکام بغاوت اور سازش میں ملوث کردار سیاسی چھاپے کے پیچھے نہیں چھپ سکتے۔ 9 مئی کے حملے کرنے والے اور کروانے والے کسی معافی کے اہل نہیں ہیں۔
انہوں نے مزید کہا کہ سیاست کی آڑ میں ریاست پر حملہ کر کے قوم کی کس خدمت کو انجام دیا گیا؟ قوم چاہتی ہے کہ 9 مئی کے ماسٹر مائنڈ اور سہولت کاروں کا مکمل احتساب ہو، اور اب وقت آ گیا ہے کہ ماسٹر مائنڈ اپنے گناہوں کا حساب دے۔
واضح رہے کہ گزشتہ روز علیمہ خان نے دعویٰ کیا تھا کہ 4 مسلح نقاب پوش افراد نے ان کے بیٹے شاہ ریز کو گھر سے اغوا کر کے لے گئے، جس کے بعد لاہور پولیس نے شاہ ریز کی گرفتاری کی تصدیق کی۔
ڈی آئی جی انویسٹی گیشن سید ذیشان رضا کے مطابق شاہ ریز کو 9 مئی کے مقدمات میں گرفتار کیا گیا ہے، کیونکہ وہ ان مقدمات میں مطلوب تھا۔ بعد ازاں لاہور کی انسداد دہشتگردی عدالت نے جناح ہاؤس حملہ کیس میں شاہ ریز خان کا 8 روزہ جسمانی ریمانڈ منظور کر لیا۔