اسلام آباد: پی ٹی آئی رہنماؤں اور دیگر افراد کے خلاف 4 اکتوبر کے احتجاج سے متعلق کیس کی سماعت ہوئی، جس میں بانی پی ٹی آئی کی بہنوں علیمہ خان اور عظمیٰ خان کے وارنٹِ گرفتاری برقرار رکھنے کا فیصلہ سنایا گیا۔
عدالتی کارروائی کے مطابق مسلسل عدم پیشی کے باعث دونوں کے خلاف پہلے ہی وارنٹ جاری کیے گئے تھے۔ تاہم انسدادِ دہشت گردی عدالت کے جج طاہر عباس سپرا کی عدم دستیابی کے باعث سماعت میں کوئی بڑی پیش رفت سامنے نہیں آسکی۔
عدالت نے قرار دیا ہے کہ اگلی سماعت پر ملزمان پر باقاعدہ فردِ جرم عائد کی جائے گی۔ گزشتہ سماعت پر حاضر ہونے والے ملزمان کو چالان کی نقول فراہم کر دی گئی تھیں۔
مزید سماعت 5 دسمبر تک ملتوی کر دی گئی۔ علیمہ خان، عظمیٰ خان اور پی ٹی آئی کارکنان کے خلاف مقدمہ تھانہ کوہسار میں درج ہے۔
