راولپنڈی: انسداد دہشت گردی کی خصوصی عدالت نے شوکت خانم اسپتال اور نمل یونیورسٹی کے اکاؤنٹس ڈی سیز کرنے کا حکم جاری کر دیا ہے۔
پراسیکیوشن کی جانب سے اسپتال اور یونیورسٹی کے اکاؤنٹس کے ڈی سیز کیے جانے پر کسی قسم کا اعتراض سامنے نہیں آیا۔ پراسیکیوٹر ظہیر شاہ نے عدالت میں کہا کہ اگر یہ اکاؤنٹس ڈی سیز کیے جائیں تو ان کی طرف سے کوئی مخالفت نہیں ہوگی۔
انہوں نے عدالت کو آگاہ کیا کہ علیمہ خان کے آئی ڈی کارڈ کے مطابق گورنر اسٹیٹ بینک کو اکاؤنٹ فریز کرنے کی درخواست دی گئی تھی۔ پراسیکیوٹر کے مطابق علیمہ خان کے بزنس اور پرسنل اکاؤنٹس کے علاوہ اگر دیگر اکاؤنٹس بھی فریز کیے گئے ہیں تو اس پر بھی کوئی اعتراض نہیں ہے۔
کیس کی سماعت انسداد دہشت گردی کی خصوصی عدالت کے جج امجد علی شاہ نے کی، جبکہ علیمہ خان کی جانب سے وکیل محمد فیصل ملک عدالت میں پیش ہوئے۔
