کراچی: جمعہ کے روز عالمی اور ملکی مارکیٹوں میں سونے کی قیمتوں میں کمی دیکھی گئی، جب کہ چاندی کی قیمتیں مستحکم رہیں۔
عالمی بلین مارکیٹ میں سونے کی فی اونس قیمت ایک ڈالر کمی کے بعد 3,302 ڈالر ہو گئی، جس کے اثرات مقامی صرافہ بازاروں پر بھی پڑے اور سونے کی قیمتوں میں کمی کا رجحان دیکھا گیا۔
پاکستانی مارکیٹ میں 24 قیراط فی تولہ سونا 100 روپے سستا ہو کر 3 لاکھ 52 ہزار 900 روپے پر آ گیا، جبکہ 10 گرام سونے کی قیمت 86 روپے کی کمی سے 3 لاکھ 2 ہزار 555 روپے ہو گئی۔
دوسری جانب چاندی کی قیمتوں میں کسی قسم کی تبدیلی نہیں ہوئی۔ فی تولہ چاندی بدستور 3 ہزار 900 روپے اور 10 گرام چاندی 3 ہزار 344 روپے پر برقرار رہی۔
