اسلام آباد: عالمی بینک نے پاکستان کیلئے 70 کروڑ ڈالر کے قرض کی منظوری دے دی ہے، جو پاکستان پبلک ریسورسز فار اینکلوسو ڈیولپمنٹ پروگرام کے تحت فراہم کیا جائے گا۔
ذرائع کے مطابق عالمی بینک کے بورڈ نے اس پروگرام کی منظوری دی ہے جس کا مقصد پاکستان میں معاشی استحکام اور عوامی خدمات کی بہتر فراہمی کو یقینی بنانا ہے۔
عالمی بینک کے مطابق یہ پروگرام وفاق اور صوبہ سندھ میں اصلاحات کو فروغ دے گا، جس کے تحت وفاق کو 60 کروڑ ڈالر اور سندھ کو 10 کروڑ ڈالر فراہم کیے جائیں گے۔ پروگرام کے تحت ٹیکس نظام اور اخراجات میں بہتری لائی جائے گی جبکہ ڈیجیٹل نظام کے ذریعے عوامی خدمات کو مزید مؤثر بنایا جائے گا۔
فنڈز صرف مطلوبہ نتائج حاصل ہونے پر جاری کیے جائیں گے، اور پروگرام آئی ایم ایف اور نیشنل فسکل پیکج کے ساتھ ہم آہنگ ہے۔ تعلیم، صحت اور سماجی شعبوں میں وسائل میں اضافے کی توقع ہے۔ عالمی بینک کے مطابق پروگرام کے مختلف مراحل کے دوران کل 1.35 ارب ڈالر فراہم کیے جائیں گے تاکہ طویل مدتی ترقی کو یقینی بنایا جا سکے۔
