نیویارک: عالمی شہرت یافتہ ٹیکنالوجی کمپنی گوگل نے اعلان کیا ہے کہ وہ امریکہ کی جامعات میں مصنوعی ذہانت (AI)، تعلیم، اور پیشہ ورانہ تربیت کو فروغ دینے کے لیے ایک ارب ڈالر کی خطیر سرمایہ کاری کرے گی۔
گوگل اور اس کی پیرنٹ کمپنی الفابیٹ کے سی ای او سندر پچائی نے ایک بلاگ پوسٹ میں کہا ہے کہ اس اقدام کا مقصد ’AI for Education Accelerator‘ پروگرام کے تحت ہر امریکی کالج طالبعلم کو مفت AI ٹریننگ اور کیریئر سرٹیفکیٹس مہیا کرنا ہے۔
ان کا کہنا تھا کہ 100 سے زیادہ کالجز اور یونیورسٹیز اس پروگرام کا حصہ بن چکی ہیں، اور آئندہ تین سالوں میں یہ سرمایہ کاری مرحلہ وار فراہم کی جائے گی، جس سے AI تحقیق، تعلیمی وظائف اور کلاؤڈ کمپیوٹنگ کی سہولیات کو فروغ دیا جائے گا۔
سندر پچائی نے وضاحت کی کہ یونیورسٹی آف مشی گن، اوہائیو اسٹیٹ یونیورسٹی، اور یونیورسٹی آف ورجینیا سمیت کئی ریاستی تعلیمی ادارے پہلے ہی اس پروگرام میں شامل ہو چکے ہیں۔
انہوں نے مزید بتایا کہ گوگل کی اس مالی معاونت میں AI پر مبنی جدید ٹولز، جیسے جیمینی چیٹ بوٹ، کی سہولت بھی شامل ہے جو طلبہ کو بغیر کسی اضافی قیمت کے دستیاب ہوں گے۔
یہ اعلان گوگل کے عالمی تعلیمی منصوبے “Gemini for Education” کے تسلسل میں کیا گیا ہے، جس کا مقصد دنیا بھر کے طلبہ اور اساتذہ کو مفت AI ٹیکنالوجی فراہم کرنا ہے۔
سندر پچائی کے مطابق امریکہ کی بڑی جامعات میں سے 80 فیصد سے زیادہ پہلے ہی ’گوگل ورک اسپیس فار ایجوکیشن‘ کا استعمال کر رہی ہیں، جو کہ AI پر مبنی تعلیمی سہولیات کی فراہمی کے لیے تیار کیا گیا ہے۔
