صوابی میں کلاؤڈ برسٹ کے نتیجے میں ہلاکتیں، ریسکیو آپریشن جاری

صوابی کے دالوڑی بالا علاقے میں اچانک ہونے والی شدید بارش نے تباہی مچا دی۔ تیز بارش کے باعث آنے والے سیلابی ریلے نے گاؤں کو اپنی لپیٹ میں لے لیا، جس سے 15 سے 20 گھروں کو نقصان پہنچا۔
ایڈیشنل ڈپٹی کمشنر ریلیف محمد قمر کے مطابق 7 گھروں کی عمارتیں مکمل طور پر ملبے کا ڈھیر بن چکی ہیں جبکہ کئی افراد ابھی بھی ملبے تلے دبے ہوئے ہیں۔
ریسکیو 1122 کے اہلکاروں کے مطابق، ایک تباہ شدہ مکان کے ملبے تلے 15 افراد پھنسے ہوئے ہیں، جن میں خواتین اور چھوٹے بچے بھی شامل ہیں۔
ان میں سعودی عرب سے حال ہی میں واپس آنے والے مشہور تیرانداز اورنگزیب کا خاندان بھی شامل ہے۔ اطلاعات کے مطابق اورنگزیب کی تین کمسن بیٹیاں بھی ملبے کے نیچے دب گئی ہیں۔
سڑکیں بہہ جانے کی وجہ سے بھاری مشینری پہنچانے میں شدید مشکلات کا سامنا ہے۔ ریسکیو اہلکار کئی گھنٹے پیدل چل کر متاثرہ گاؤں پہنچے اور چھوٹے آلات سے ملبہ کاٹ کر افراد کو نکالنے میں مصروف ہیں۔
اب تک 11 افراد کی لاشیں نکالی جا چکی ہیں، جبکہ ریسکیو آپریشن رات بھر بلا تعطل جاری رکھنے کا فیصلہ کیا گیا ہے۔
صوبائی حکومت نے متاثرہ علاقے میں فوری طور پر کمبل، خوراک اور دیگر امدادی سامان پہنچا دیا ہے۔
ملبے تلے موجود افراد کی جان بچانے کی آخری کوششیں جاری ہیں، اور ہر لمحہ بہت قیمتی ثابت ہو رہا ہے۔