کراچی کے علاقے قیوم آباد میں کمسن بچوں اور بچیوں کو زیادتی کا نشانہ بنانے اور ان کی نازیبا ویڈیوز بنانے والے سفاک ملزم کے خلاف ایک اور مقدمہ درج کر لیا گیا ہے۔ یہ مقدمہ ڈیفنس تھانے میں سندھ عارضی رہائشی ایکٹ کی خلاف ورزی پر ملزم اور مکان مالک کے خلاف دائر کیا گیا۔
پولیس کے مطابق اس نئے مقدمے کے بعد مرکزی ملزم شبیر احمد تنولی ولد محمد شفیق پر درج مقدمات کی تعداد سات ہو گئی ہے۔ مقدمہ سرکار کی مدعیت میں درج کیا گیا جس میں مکان مالک اعجاز اعوان کو بھی شریکِ ملزم بنایا گیا ہے۔ پولیس کے مطابق ملزم شبیر اور مکان مالک نے کرایہ داری معاہدہ تھانے میں جمع نہیں کرایا تھا۔
تحقیقات سے انکشاف ہوا ہے کہ ملزم شبیر احمد نے 60 سے زائد بچوں اور بچیوں کو اپنی درندگی کا نشانہ بنایا۔ ملزم کے موبائل فون سے برآمد ہونے والا مواد فرانزک تجزیے کے لیے اسلام آباد بھیج دیا گیا ہے۔ پولیس کو شبہ ہے کہ ملزم بچوں کی ویڈیوز اکٹھی کر کے فروخت بھی کرتا رہا ہے۔ اس مقصد کے لیے اس کے تمام سوشل میڈیا اکاؤنٹس کی چھان بین جاری ہے۔
