لاہور: پاکستان تحریک انصاف کے مرکزی رہنما شبلی فراز کے خلاف ناقابلِ ضمانت وارنٹ گرفتاری جاری کر دیے گئے ہیں۔
یہ کارروائی لاہور کینٹ کچہری میں بانی پی ٹی آئی عمران خان کی رہائش گاہ کے باہر اسلام آباد پولیس پر حملے سے متعلق کیس کی سماعت کے دوران عمل میں آئی۔ جوڈیشل مجسٹریٹ سہیل رفیق نے مقدمے کی سماعت کرتے ہوئے شبلی فراز کے خلاف ناقابل ضمانت وارنٹ جاری کیے اور اس فیصلے کا تحریری حکم بھی جاری کر دیا۔
اسی مقدمے میں عمران خان کو بھی طلبی کے سمن جاری کیے گئے، جو ان کی جیل میں موجودگی کے باعث روبکار کے ذریعے بھجوائے گئے ہیں۔ عدالت نے آئندہ سماعت 30 جولائی کو مقرر کر دی ہے۔
یاد رہے کہ یہ مقدمہ تھانہ ریس کورس نے اسلام آباد پولیس پر حملے کے الزام میں درج کیا تھا۔
