شاہین شاہ آفریدی نے ون ڈے کرکٹ میں عالمی ریکارڈ قائم کر دیا

پاکستان کے فاسٹ بولر شاہین شاہ آفریدی نے ون ڈے کرکٹ میں عالمی ریکارڈ قائم کر دیا ہے۔
ویسٹ انڈیز کے خلاف برائن لارا اسٹیڈیم میں کھیلے گئے پہلے ون ڈے میچ میں پاکستان نے ٹاس جیت کر پہلے بولنگ کا فیصلہ کیا اور میزبان ٹیم کو 50 اوورز میں 280 رنز تک محدود کر دیا۔
ویسٹ انڈیز کی جانب سے ایون لوئس، کپتان شائے ہوپ اور روسٹن چیز نے نصف سنچریاں اسکور کیں۔ پاکستان کی بولنگ میں شاہین شاہ آفریدی نے 51 رنز دے کر 4 وکٹیں حاصل کیں، جبکہ نسیم شاہ نے 55 رنز کے عوض 3 کھلاڑی آؤٹ کیے۔
شاہین شاہ آفریدی نے صرف 65 ون ڈے میچز میں 131 وکٹیں حاصل کرکے یہ اعزاز اپنے نام کر لیا، اور دنیا کے پہلے بولر بن گئے جنہوں نے اتنی کم میچز میں اتنی وکٹیں حاصل کیں۔ اس سے پہلے یہ ریکارڈ افغانستان کے راشد خان کے پاس تھا جنہوں نے 65 میچز میں 128 وکٹیں حاصل کی تھیں۔
ہدف کے تعاقب میں پاکستان نے شاندار بیٹنگ کا مظاہرہ کیا اور 48.5 اوورز میں 5 وکٹوں کے نقصان پر 284 رنز بنا کر میچ جیت لیا۔ ڈیبیو کرنے والے حسن نواز نے ناقابل شکست 63 رنز کی اننگز کھیلی، جس میں ایک چھکا اور فیصلہ کن چوکا شامل تھا، جبکہ کپتان محمد رضوان نے 53 رنز بنائے۔
اس فتح کے ساتھ پاکستان نے تین میچز کی سیریز میں 1-0 کی برتری حاصل کر لی ہے۔ دوسرا اور تیسرا میچ بھی برائن لارا اسٹیڈیم میں اتوار اور منگل کو کھیلے جائیں گے۔