اسلام آباد: سینیٹ کا 51 نکاتی ایجنڈا جاری کر دیا گیا ہے، جس میں مجموعی طور پر 21 قوانین کے بلز شامل کیے گئے ہیں۔
اجلاس کے دوران 10 قوانین پیش کیے جائیں گے، جبکہ 9 کی منظوری لی جائے گی اور اراکین کی جانب سے 2 قوانین واپس لیے جائیں گے۔ ایجنڈے میں پیکا ایکٹ ترمیمی بل بھی شامل ہے، جو اجلاس میں پیش کیا جائے گا۔
اس کے علاوہ پی ایم ڈی سی ترمیمی بل 2025، اسلام آباد میٹرو بس سروس بل 2025، سیکیورٹی ایکسچینج کمیشن ترمیمی بل 2025، اور پاکستان براڈکاسٹ کارپوریشن ترمیمی بل بھی اجلاس میں پیش کیے جائیں گے۔
ایجنڈے میں الیکٹرانک نیکوٹین ریگولیشن ترمیمی بل 2024 اور لیگل پریکٹیشنر اینڈ بار کونسل ترمیمی بل بھی شامل ہیں۔ گرفتاری، حراست اور زیر تفتیش قیدیوں کے حقوق سے متعلق بل کی منظوری بھی ایجنڈے میں شامل ہے۔
علاوہ ازیں تعزیراتِ پاکستان سیکشن 323، 330 اور 331 میں ترمیمی بل کی منظوری، ضابطہ فوجداری کی شیڈول ٹو میں 297 اے نئی شق شامل کرنے سے متعلق سی آر پی سی ترمیمی بل، مینٹل ہیلتھ ترمیمی بل اور پاکستان نرسنگ کونسل ترمیمی بل 2025 کی منظوری بھی ایجنڈے میں شامل ہیں۔
