اقوامِ متحدہ کے سیکریٹری جنرل انتونیو گوتیریس نے پاکستان اور بھارت میں شدید بارشوں اور سیلاب کے باعث ہونے والی ہلاکتوں پر گہرا دکھ اور افسوس کا اظہار کیا ہے۔
انہوں نے کہا ہے کہ اگر پاکستان یا بھارت میں سے کسی ملک نے باضابطہ امداد کی درخواست کی تو اقوامِ متحدہ فوری طور پر ریلیف فراہم کرنے کے لیے تیار ہے۔
ترجمان اسٹیفن دوجارک کے مطابق سیکریٹری جنرل نے متاثرہ خاندانوں سے دلی تعزیت کی اور ان کے ساتھ یکجہتی کا اظہار کیا۔ انہوں نے کہا کہ یہ وقت متاثرین کے ساتھ کھڑے ہونے اور ان کی مدد کے لیے آگے بڑھنے کا ہے، اور ضرورت پڑنے پر اقوامِ متحدہ ہر ممکن امدادی سرگرمی میں شامل ہوگا۔
پاکستان میں حالیہ شدید بارشوں اور سیلاب نے بڑی تباہی مچائی ہے۔ صرف خیبرپختونخوا میں دو دن میں 323 افراد جان سے ہاتھ دھو بیٹھے جبکہ ملک بھر میں ہلاکتوں کی مجموعی تعداد 657 تک پہنچ گئی ہے۔
یاد رہے کہ 2022 میں بھی گوتیریس پاکستان کے دورے پر آئے تھے اور سندھ و بلوچستان سمیت شدید متاثرہ علاقوں میں تباہی کا خود جائزہ لیا تھا۔
اسی دوران ویٹی کن سٹی سے بھی متاثرہ عوام کے لیے ہمدردی اور دعاؤں کا پیغام آیا ہے۔ پوپ لیو چہار دہم نے اتوار کے دن خصوصی دعا کی اور کہا کہ وہ پاکستان، بھارت اور نیپال کے عوام کے ساتھ ہمدردی رکھتے ہیں جو بارشوں اور سیلاب کی آفت سے متاثر ہیں۔ پوپ نے متاثرہ خاندانوں کے لیے دعاؤں اور نیک خواہشات کا اظہار کیا۔
