اسرائیلی وزیراعظم بنجمن نیتن یاہو نے خبردار کیا ہے کہ اگر اسرائیل کی مقرر کردہ “ریڈ لائن” کو شام میں عبور کیا گیا تو فوجی کارروائیاں جاری رہیں گی۔ اپنے حالیہ بیان میں نیتن یاہو نے کہا کہ گولان ہائٹس سے دروز پہاڑوں تک کے علاقوں کو عسکری سرگرمیوں سے پاک رکھنا اور دروز برادری کا تحفظ اسرائیل کے لیے ریڈ لائن ہے، اور جب بھی یہ حد پار کی گئی، اسرائیل طاقت سے جواب دے گا۔
انہوں نے الزام عائد کیا کہ شامی حکومت نے ان اصولوں کی خلاف ورزی کی ہے۔ یاد رہے کہ بدھ کے روز اسرائیلی فضائیہ نے دمشق میں شامی وزارتِ دفاع کی عمارت سمیت صدارتی محل کے نزدیک کئی مقامات کو نشانہ بنایا تھا۔
اسرائیل کی جانب سے مطالبہ کیا گیا تھا کہ شامی افواج فوری طور پر دروز قبائل کے علاقے سویدا سے اپنی موجودگی ختم کریں۔
