روس نے امریکا اور اسرائیل کے ایران پر کیے گئے حملوں کی سخت مذمت کی ہے اور انہیں بین الاقوامی قوانین کی صریح خلاف ورزی قرار دیا ہے۔ روسی وزارت خارجہ نے بیان میں کہا کہ یہ کارروائیاں منصوبہ بندی کے تحت دانستہ جارحیت ہیں اور ایک آزاد ریاست کے حق خود ارادیت کی خلاف ورزی کرتی ہیں۔
بیان میں مزید کہا گیا کہ امریکا اور اسرائیل کی یہ کارروائیاں مذاکراتی عمل کی آڑ میں کی جا رہی ہیں، جبکہ حقیقت میں خطے کو انسانی، اقتصادی اور ممکنہ تابکاری خطرات کی طرف دھکیل رہی ہیں۔ روس نے اقوام متحدہ اور آئی اے ای اے پر زور دیا ہے کہ وہ اس غیر ذمہ دارانہ اقدام کا غیر جانبدارانہ جائزہ لیں۔
اعلامیے میں واضح کیا گیا کہ امریکا اور اسرائیل ایران کی آئینی قیادت کو کمزور کرنے اور اپنی پسند کے حکومتی نظام کو مسلط کرنے کی کوشش میں ہیں، جبکہ ایران نے طاقت کے دباؤ کے آگے سر نہیں جھکایا۔ روس نے زور دیا کہ بمباری کے یہ اقدامات ناقابل قبول ہیں اور اس مسئلے کا حل سیاسی اور سفارتی طریقوں سے نکالا جانا چاہیے۔
روسی وزارت خارجہ نے اعلان کیا کہ وہ بین الاقوامی قانون، باہمی احترام اور خطے کے مفادات کو مدنظر رکھتے ہوئے پرامن حل کے فروغ میں ہر ممکن مدد دینے کے لیے تیار ہے۔
