اسلام آباد میں پریس کانفرنس کرتے ہوئے وفاقی وزیر دفاع خواجہ آصف نے کہا ہے کہ سابق وزیراعظم عمران خان اور ان کی کابینہ کے وزیر غلام سرور خان نے پی آئی اے کو تباہی کے دہانے پر پہنچا دیا۔ انہوں نے کہا کہ ان دونوں نے ریاستی اداروں کو نقصان پہنچا کر قومی وقار کو مجروح کیا اور اس کا خمیازہ پوری قوم نے بھگتا۔
خواجہ آصف کا کہنا تھا کہ غلام سرور نے پی آئی اے پر خود تنقید کر کے عالمی اداروں کو پاکستان کی قومی ایئرلائن پر پابندیاں لگانے کی دعوت دی، جس سے اربوں روپے کا نقصان ہوا۔ اس دوران پی آئی اے کا وقار بری طرح متاثر ہوا اور وہ سہولتیں بھی ختم ہو گئیں جو ایئرلائن پہلے مسافروں کو فراہم کرتی تھی، جیسے میتوں کی مفت منتقلی۔
انہوں نے کہا کہ اوورسیز پاکستانیوں کے لیے پی آئی اے کی سروس بند ہونا ایک بڑا صدمہ تھا، لیکن اب یہ مسئلہ حل ہو رہا ہے۔ پی آئی اے کو دوبارہ آپریٹنگ لائسنس ملنے جا رہا ہے اور جلد یورپی ممالک میں پروازیں بحال ہوں گی۔
وفاقی وزیر نے کہا کہ حکومت پی آئی اے کو پرائیویٹائز کرنے کی تیاری کر رہی ہے تاکہ اس کی مالی حالت بہتر ہو اور اسے مزید فعال بنایا جا سکے۔ انہوں نے اس عمل میں سول ایوی ایشن اتھارٹی، سعد رفیق اور وزیراعظم شہباز شریف کی کوششوں کو سراہا اور کہا کہ یہ ایک تاریخی موقع ہے جس پر پوری قوم کو مبارکباد دیتا ہوں۔
