کبیروالا(قوم نیوز) پنجاب میںبچوں اور نوجوانوں میں خسرہ کے کیسز میں تیزی سے اضافہ ہونے لگا، کبیروالامیںمبینہ طور پر خسرہ کی وبا سے 7 بچے دم توڑ گئے۔تفصیلات کے مطابق کبیروالا میں اہل علاقہ نے مطالبہ کیا ہے کہ متعددبچے خسرہ کی وبا میں مبتلا ہیں، محکمہ صحت فوری اقدامات کرکے ٹیمیں بھیجے۔اہل علاقہ کے مطابق خسرہ وبا کے باعث گزشتہ ہفتے 7 بچوں کی اموات ہوئیں، خسرہ کی روک تھام کیلئے فوری اقدامات کئے جائیں۔محکمہ صحت کا کہنا ہے کہ اموات کی وجہ خسرہ ابھی کنفرم نہیں، بچوں کی موت کی وجوہات کا تعین کیا جارہا ہے۔وزیر اعلیٰ پنجاب مریم نواز تحصیل انتظامیہ کی نااہلی کا نوٹس لیتے ہوئے کارروائی کریں۔دوسری جانب کراچی میں بھی بچوں اور نوجوانوں میں خسرہ کے کیسز میں تیزی سے اضافہ ہونے لگا ہے۔ کراچی میں خسرہ کے دوران تیز بخار کے ساتھ کھانسی اور جسم کے مختلف حصوں پر چھوٹے چھوٹے دانے نکل رہے ہیں۔طبی ماہرین کا کہنا ہے کہ بہت سے ایسے کیسز بھی رپورٹ ہوئے ہیں جن کو خسرہ ویکسین لگائی تھی پھر بھی وہ اس بیماری میں مبتلا ہیں۔سندھ میں 2025 خسرہ کے حوالے سے بہت زیادہ خطرناک ثابت ہوا ہے، 11 ہزار سے زائد مشتبہ کیسز میں سے 4 ہزار 2 سو سے زائد تصدیق شدہ انفیکشن شامل تھے جبکہ 65 بچے بھی جاں بحق ہوگئے تھے۔
