اسلام آباد: حکومت نے ملک میں ہائی اسپیڈ انٹرنیٹ کی سہولت کو بڑھانے کے لیے 13 ارب روپے مالیت کے منصوبے منظور کر لیے ہیں۔ وزارت آئی ٹی و ٹیلی کمیونیکیشن کے زیرِ انتظام یونیورسل سروس فنڈ کے بورڈ آف ڈائریکٹرز کے اجلاس میں ملک کے 11 اضلاع کے لیے 9 بڑے فائبر آپٹیکل اور وائس کمیونیکیشن پراجیکٹس کی منظوری دی گئی۔
ذرائع کے مطابق وفاقی وزیر آئی ٹی شزا فاطمہ کی ہدایت پر شہری اور دیہی علاقوں کے درمیان ڈیجیٹل فرق کو ختم کرنے کی کوششوں میں تیزی لائی جا رہی ہے۔ یہ منصوبے مجموعی طور پر 55 لاکھ سے زائد افراد کو سہولت فراہم کریں گے اور 11 اضلاع کے 178 ٹاؤنز، یونین کونسلز اور 753 گاؤں کے مکین ڈیجیٹل دنیا سے منسلک ہو سکیں گے۔
چیئرمین یو ایس ایف بورڈ نے کہا کہ دیہی اور پسماندہ علاقوں میں انٹرنیٹ اور موبائل کنکٹیویٹی سے ڈیجیٹل اکانومی کو فروغ ملے گا۔ یو ایس ایف کے پہلے سے جاری منصوبوں سے اب تک دیہی علاقوں کے 3 کروڑ 94 لاکھ افراد کو کنکٹیویٹی سروسز تک رسائی حاصل ہو چکی ہے۔
سیالکوٹ، نارووال، زیارت اور کوئٹہ اضلاع کے لیے 3 منصوبوں میں 1428 کلومیٹر فائبر آپٹیکل کیبل بچھائی جائے گی جبکہ عمرکوٹ، گجرانوالہ، کوہاٹ، خضدار، مظفرگڑھ، مانسہرہ اور منڈی بہاءالدین اضلاع کے لیے چھ براڈ بینڈ منصوبے شامل ہیں۔ اجلاس میں چیئرمین پی ٹی اے میجر جنرل حفیظ الرحمان، ممبر ٹیلی کام جہانزیب رحیم، محمد یوسف اور عائلہ ماجد بھی شریک ہوئے۔