جہانیاں (کرائم رپورٹر )گورنمنٹ گرلز ایلیمنٹری سکول 138 دس آر میں سکول ٹائم کے دوران 10 سالہ معصوم طالبعلم عثمان کے ساتھ درجہ چہارم کے ملازم محمد احمد کی مبینہ زیادتی کا لرزہ خیز واقعہ سامنے آیا جس نے علاقے میں خوف و ہراس پھیلا دیا۔واقعہ کی خبر روزنامہ قوم ملتان میں شائع ہونے کے بعد اعلیٰ حکام نے فوری نوٹس لیتے ہوئے کارروائی کا آغاز کیا، پولیس نے ملزم کو گرفتار کر کے مقدمہ درج کر لیا جبکہ محکمہ تعلیم نے ملزم کو معطل کر کے ریگولر انکوائری کا حکم دے دیا۔متاثرہ بچے کے والد شوکت علی جو میونسپل کمیٹی جہانیاں میں مالی ہیں، نے الزام عائد کیا کہ ملزم کے رشتہ دار 20 لاکھ روپے کے عوض صلح پر دباؤ ڈال رہے ہیں اور جان سے مارنے کی دھمکیاں دے رہے ہیں۔والد کے مطابق ملزم پہلے بھی متعدد بچوں سے زیادتی کر چکا ہے مگر ہر بار معاملہ دبا دیا گیا۔ذرائع کا کہنا ہے کہ اگر واقعے پر مزید گہری اور غیرجانبدار تحقیقات کی جائیں تو مزید متاثرہ بچوں کے چہرے سامنے آ سکتے ہیں۔ علاقہ مکینوں نے شدید غم و غصے کا اظہار کرتے ہوئے کہا کہ یہ کوئی ایک واقعہ نہیں بلکہ نظام کی ناکامی اور غفلت کا نتیجہ ہے۔متاثرہ بچے کے والد شوکت علی نے وزیراعلیٰ پنجاب محترمہ مریم نواز شریف، آر پی او ملتان اور ڈی پی او خانیوال سے مطالبہ کیا ہے کہ وہ فوری طور پر نوٹس لے کر شفاف تحقیقات کروائیں تاکہ اس درندگی کے سلسلے کا ہمیشہ کے لیے خاتمہ ہو سکے۔روزنامہ قوم ملتان نے ہمیشہ مظلوموں کی آواز بن کر سچ اجاگر کیا ہے اور اب بھی واضح کرتا ہے کہ انصاف میں کسی قسم کی تاخیر یا کوتاہی برداشت نہیں کی جائے گی۔
