راولپنڈی: پی ٹی آئی کے بانی چیئرمین عمران خان کی ہمشیرہ علیمہ خان نے کہا ہے کہ جو ججز انصاف فراہم کرنے میں ناکام ہیں، انہیں اپنے عہدے چھوڑ دینا چاہیے۔
عدالت کے باہر میڈیا سے بات کرتے ہوئے علیمہ خان نے عمران خان کی مبینہ تنہائی پر تشویش کا اظہار کیا اور بتایا کہ قانون کے مطابق انہیں ہفتہ وار فیملی، وکلاء اور دیگر رشتہ داروں سے ملاقات کی اجازت ہے، لیکن اس پر عمل درآمد نہیں ہو رہا۔
علیمہ خان نے کہا کہ اسلام آباد ہائی کورٹ عمران خان کی اپیلوں کی سماعت نہیں کر رہی، کیونکہ اگر اپیل سنی گئی تو انہیں ضمانت دینی پڑے گی۔ ان کے مطابق ان کے خلاف مقدمات میں صرف جلدی سے سزا سنانے کی نیت ہے، اور آئندہ دس سے بارہ دن میں سزا دینے کا ارادہ ہے، لیکن وہ احتجاج جاری رکھیں گی۔
انہوں نے مزید دعویٰ کیا کہ ان کے نام سے بھارت میں مصنوعی ذہانت کے ذریعے ایک جعلی انٹرویو بنایا گیا، جس سے ظاہر ہوتا ہے کہ جعلسازی پاکستان میں ہوئی۔ علیمہ خان نے کہا کہ پاکستانی میڈیا ان کے انٹرویوز نشر نہیں کرتا، جبکہ بین الاقوامی میڈیا مسلسل رابطے میں ہے۔
ان کے مطابق قانون کے تحت عمران خان سے منگل کو چھ فیملی ممبرز اور چھ وکلاء ملاقات کر سکتے ہیں، جبکہ جمعرات کو چھ دوست یا رشتہ دار ملاقات کر سکتے ہیں، اور بشریٰ بی بی کے لیے بھی چھ فیملی ممبرز ملاقات کا حق رکھتے ہیں۔
