اسلام آباد: جسٹس طارق جہانگیری ڈگری کیس میں اہم پیش رفت سامنے آئی ہے۔ جسٹس طارق جہانگیری نے اسلام آباد ہائیکورٹ میں کیس کی سماعت کے آرڈر کو وفاقی آئینی عدالت میں چیلنج کرنے کا فیصلہ کیا ہے اور اس مقصد کے لیے تین سینئر وکلاء پر مشتمل قانونی ٹیم تشکیل دے دی ہے۔
ذرائع کے مطابق اکرم شیخ اور بیرسٹر صلاح الدین ہائیکورٹ میں کیس کی پیروی کریں گے، جبکہ عزیر بھنڈاری وفاقی آئینی عدالت میں جسٹس طارق جہانگیری کی نمائندگی کریں گے۔ آج وفاقی آئینی عدالت میں کیس کے قابل سماعت ہونے کے فیصلے کو چیلنج کیا جائے گا۔
اسی دوران اسلام آباد ہائیکورٹ کے آرڈر کے خلاف وفاقی آئینی عدالت میں اپیل دائر کی جائے گی اور ہائیکورٹ میں بھی جسٹس طارق جہانگیری کی جانب سے متعلقہ درخواستیں جمع کرائی جائیں گی۔
