ایران اور اسرائیل کے درمیان جاری کشیدگی کو کم کرنے کے لیے یورپ نے سفارتی کوششیں تیز کر دی ہیں۔ جرمنی، فرانس اور برطانیہ نے ایران کو فوری طور پر مذاکرات کی پیشکش کر دی ہے تاکہ خطے میں بڑھتی ہوئی کشیدگی پر قابو پایا جا سکے۔
جرمن وزیر خارجہ یوہان واڈیفول، جو اس وقت مشرق وسطیٰ کے دورے پر ہیں، نے جرمن نشریاتی ادارے ARD کو انٹرویو دیتے ہوئے کہا کہ “ابھی بھی امید کی ایک کرن باقی ہے۔ اگر ایران تیار ہو تو ہم فوری طور پر اس کے ساتھ جوہری پروگرام سمیت دیگر معاملات پر مذاکرات شروع کر سکتے ہیں۔”
ان کا کہنا تھا کہ مذاکرات کی بنیادی شرط یہ ہے کہ ایران کی سرگرمیاں خطے، اسرائیل اور یورپ کے لیے خطرہ نہ بنیں۔
تینوں یورپی ممالک کی جانب سے یہ پیشکش اس وقت سامنے آئی ہے جب ایران اور اسرائیل کے درمیان صورتحال انتہائی نازک مرحلے میں داخل ہو چکی ہے اور کسی بھی وقت بڑے تصادم کا خدشہ ہے۔ یورپی سفارتی حلقے اس پیشکش کو موجودہ حالات میں ایک سنجیدہ کوشش قرار دے رہے ہیں۔
