کراچی: پاکستان پیپلز پارٹی کے چیئرمین بلاول بھٹو زرداری کے حقیقت پر مبنی بیان کے بعد بھارتی اداکار اور بھارتیہ جنتا پارٹی کے رہنما متھن چکرورتی نے پاکستان کے خلاف زہریلی زبان استعمال کی اور میزائل حملے کی دھمکی دے دی۔ یہ ویڈیو سوشل میڈیا پر وائرل ہو چکی ہے۔
متھن چکرورتی نے صحافی کے سوال پر کہا کہ اگر حالات خراب ہوئے تو پاکستان پر براہموس میزائل داغے جائیں گے، اور اگر کچھ نہ ہوا تو ایک ڈیم بنایا جائے گا جسے وقتِ ضرورت پر کھولا جا سکتا ہے، جس سے سونامی جیسا اثر ہوگا۔
اداکار نے بعد میں وضاحت کرتے ہوئے کہا کہ ان کا مقصد پاکستان کے عوام نہیں بلکہ صرف بلاول بھٹو اور ان کی قیادت ہے، اور پاکستان کے عوام کے ساتھ ان کا کوئی تعلق نہیں۔
خیال رہے کہ بلاول بھٹو نے بھٹ شاہ میں خطاب کے دوران کہا تھا کہ دریائے سندھ پر حملہ تہذیب اور ثقافت پر حملہ سمجھا جائے گا، اور انہوں نے مودی کو عالمی سطح پر بے نقاب کرنے کا وعدہ کیا تھا۔
