بجلی سستی ہونے کا امکان، صارفین کیلئے بڑا ریلیف متوقع

اسلام آباد: ملک بھر میں بجلی کے صارفین کے لیے خوشخبری، بجلی کی قیمت میں فی یونٹ 1 روپے 75 پیسے کمی کا امکان ظاہر کیا گیا ہے۔
ذرائع کے مطابق سینٹرل پاور پرچیزنگ ایجنسی (سی پی پی اے) نے چوتھی سہ ماہی ایڈجسٹمنٹ کی مد میں نیپرا کو درخواست دے دی ہے۔ یہ درخواست مالی سال 2024-25 کی آخری سہ ماہی سے متعلق ہے، جس کی منظوری کی صورت میں صارفین کو 53 ارب 39 کروڑ روپے سے زائد کا ریلیف حاصل ہوگا۔
یہ سہ ماہی ایڈجسٹمنٹ نہ صرف سرکاری ڈسکوز بلکہ کے الیکٹرک پر بھی لاگو ہوگی۔ نیپرا 4 اگست کو اس درخواست پر باضابطہ سماعت کرے گا۔
اگر نیپرا نے ستمبر، اکتوبر اور نومبر کے لیے دی گئی تجاویز کو منظور کر لیا تو ممکنہ طور پر ریلیف کی شرح 2 روپے 10 پیسے فی یونٹ تک بڑھ سکتی ہے۔
قیمتوں میں کمی سے متعلق حتمی فیصلہ نیپرا کی جانب سے سماعت کے بعد کیا جائے گا۔