لاہور: نائب امیر جماعت اسلامی پاکستان، لیاقت بلوچ نے حکومت اور عدلیہ کے سامنے متعدد مطالبات پیش کرتے ہوئے کہا ہے کہ بانی پاکستان تحریکِ انصاف اور ان کی اہلیہ کو جیل مینوئل کے مطابق ان کے قانونی حقوق سے محروم نہ رکھا جائے۔
لیاقت بلوچ نے اپنے بیان میں زور دیا کہ آئین سے کھیلنے والے تمام فوجی، سیاستدان اور بیوروکریٹس کو احتساب کے دائرے میں لایا جائے اور سول بیوروکریٹس، ججوں اور فوجیوں کے اثاثوں کا مکمل اور شفاف ڈیکلریشن لازمی قرار دیا جائے۔ ان کا کہنا تھا کہ پی ٹی آئی نے فیض حمید سے واضح طور پر فاصلہ اختیار کر لیا ہے اور ہر سرکاری افسر کو حکمران جماعت کا غلام بننے سے گریز کرنا چاہیے۔
مزید برآں، لیاقت بلوچ نے کہا کہ آزاد کشمیر اور گلگت بلتستان کو مکمل سہولیات فراہم کی جائیں، تحریک آزادی کے بیس کیمپ مضبوط کیے جائیں اور دونوں خطوں کو آئین کے مطابق این ایف سی ایوارڈ میں حصہ دیا جائے۔
لیاقت بلوچ نے پنجاب حکومت سے بھی مطالبہ کیا کہ بلدیاتی کالا قانون واپس لیا جائے اور صوبے میں بااختیار بلدیاتی نظام نافذ کیا جائے تاکہ مقامی سطح پر عوامی شمولیت اور ترقی ممکن ہو سکے۔
