کراچی: بانی پاکستان، بابائے قوم، قائداعظم محمد علی جناح کا یومِ وفات آج ملک بھر میں نہایت عقیدت، احترام اور جذبۂ محبت کے ساتھ منایا جا رہا ہے۔ ملک کے ہر کونے میں سرکاری اور نجی سطح پر خصوصی تقاریب کا انعقاد کیا گیا ہے، جن میں قائداعظم کی لازوال خدمات اور قربانیوں کو یاد کیا جا رہا ہے۔ مزارِ قائد پر حکومتی شخصیات، سیاسی رہنما، مسلح افواج کے نمائندے اور عام شہری پھولوں کی چادریں چڑھانے اور دعاوں میں شریک ہونے کے لیے آئے۔
ملک بھر میں قرآن خوانی کا اہتمام کیا گیا تاکہ بابائے قوم کی روح کے ایصالِ ثواب میں حصہ لیا جا سکے۔ اس کے علاوہ مختلف تنظیموں کی جانب سے سیمینارز، مذاکرے اور تعلیمی تقاریب منعقد کی جا رہی ہیں، جن میں نوجوان نسل کو قائداعظم کے افکار، نظریات اور جدوجہد سے روشناس کرایا جا رہا ہے تاکہ وہ ان کے اصولوں کو اپنی زندگیوں میں اپنانے کی ترغیب حاصل کریں۔
قائداعظم محمد علی جناح 25 دسمبر 1876 کو کراچی میں پیدا ہوئے۔ انہوں نے ابتدائی تعلیم سندھ مدرستہ الاسلام سے حاصل کی اور اعلیٰ تعلیم کے لیے برطانیہ کا سفر کیا، جہاں 1896 میں بیرسٹر بن کر ہندوستان واپس آئے۔ 1904 میں انہوں نے انڈین نیشنل کانگریس کے اجلاس میں حصہ لے کر عملی سیاست کا آغاز کیا۔ 1906 میں وہ کانگریس کے رکن بنے اور 1913 میں آل انڈیا مسلم لیگ میں شامل ہوئے۔ 1916 میں ان کی کوششوں سے میثاقِ لکھنؤ طے پایا، جس کے نتیجے میں برصغیر کے مسلمانوں کی الگ سیاسی شناخت تسلیم کی گئی۔
قائداعظم کی شخصیت اور قیادت آج بھی پاکستانی عوام کے لیے روشنی کی مانند ہے، ان کے اصول، عدل، انصاف اور قومی یکجہتی کے نظریات ہر دور میں ہماری رہنمائی کرتے ہیں۔ آج کے دن ملک کے ہر حصے میں ان کی خدمات کو یاد کرنے اور ان کے مشن کو آگے بڑھانے کا پیغام دیا جا رہا ہے۔