اسلام آباد: ملک بھر میں انسداد منشیات فورس (اے این ایف) نے مختلف شہروں میں 9 کامیاب کارروائیوں کے دوران 75 لاکھ 61 ہزار روپے سے زائد مالیت کی 76.283 کلوگرام منشیات برآمد کرتے ہوئے 7 افراد کو گرفتار کرلیا۔
ترجمان اے این ایف کے مطابق، یہ کارروائیاں منشیات اسمگلنگ اور خرید و فروخت کے خلاف جاری قومی مہم کا حصہ ہیں۔
باچا خان انٹرنیشنل ایئرپورٹ پر قطر جانے والے مسافر کے سامان سے 773 گرام آئس پکڑی گئی۔ لاہور میں ایک کوریئر آفس سے آسٹریلیا بھیجے جانے والے پارسل سے 2.2 کلوگرام آئس برآمد ہوئی، جب کہ علامہ اقبال انٹرنیشنل ایئرپورٹ کے کارگو سیکشن سے امریکا جانے والے پارسل میں 210 گرام افیون برآمد کی گئی۔
مزید برآمدگی جامشورو ٹول پلازہ کے قریب کی گئی، جہاں پشاور سے کراچی بھیجے جانے والے کارگو میں مشینری کے پرزوں میں چھپائی گئی 36 کلوگرام چرس قبضے میں لی گئی۔
شیخوپورہ موٹروے ٹول پلازہ پر ایک گاڑی سے 6 کلوگرام افیون اور 24 کلوگرام چرس برآمد کر کے دو ملزمان کو حراست میں لے لیا گیا، جبکہ حب کے آر سی ڈی روڈ سے ایک گاڑی سے 2.4 کلوگرام آئس اور ایک ملزم کو گرفتار کیا گیا۔
لاہور کے شالیمار گارڈن کے قریب کارروائی میں ایک ملزم سے 3 کلوگرام چرس اور 400 گرام آئس برآمد ہوئی، جبکہ اسلام آباد موٹروے ٹول پلازہ پر بس میں سوار ایک مسافر سے 1.2 کلوگرام چرس پکڑی گئی
علاوہ ازیں گلگت میں قراقرم یونیورسٹی روڈ پر ایک موٹر سائیکل سوار سے 100 گرام چرس برآمد کر لی گئی۔
تمام گرفتار افراد کے خلاف انسداد منشیات ایکٹ کے تحت مقدمات درج کر کے مزید تحقیقات شروع کر دی گئی ہیں۔
