ایک مخلوق ایسی ہے جو پاکستان میں اچھی خبروں پر خوش نہیں ہوتی، وزیر اطلاعات پنجاب

لاہور: پنجاب کی وزیر اطلاعات عظمیٰ بخاری نے کہا ہے کہ پاکستان میں کچھ عناصر ایسے ہیں جو خوشخبریوں پر بھی خوش نہیں ہوتے۔
پریس کانفرنس میں گفتگو کرتے ہوئے عظمیٰ بخاری نے کہا کہ اگرچہ ملک میں گرمی کا موسم ہے مگر خوشیوں کا موسم بھی جاری ہے۔ پنجاب حکومت کی جانب سے حاصل کی گئی کامیابیوں پر بعض حلقوں کو تکلیف پہنچی ہے۔
انہوں نے کہا کہ گزشتہ روز وفاقی بجٹ پیش کیا گیا جس میں اس مرتبہ تنخواہ دار طبقے پر بوجھ کم کیا گیا۔ میں وزیر اعظم شہباز شریف کو اس کامیاب بجٹ پر مبارکباد پیش کرتی ہوں۔
صوبائی وزیر نے کہا کہ بدقسمتی سے پاکستان میں ایک مخصوص گروہ ایسا ہے جو ملک میں کسی بھی خوشخبری پر خوش نہیں ہوتا۔ کل قومی اسمبلی کے اجلاس میں بھی یہی رویہ دیکھنے کو ملا۔ کچھ لوگ چاہتے ہیں کہ پاکستان بھی سری لنکا جیسا بن جائے۔
عظمیٰ بخاری نے مزید کہا کہ اسٹاک مارکیٹ میں 2100 پوائنٹس کا اضافہ ہوا ہے جو معیشت کے اعتماد کی علامت ہے۔ تحریک انصاف ایسی جماعت ہے جو ملک کی ترقی میں رکاوٹ بنتی ہے۔ اب وہ واشنگٹن جانے کی بات کر رہے ہیں جبکہ گوہر خان کہتے ہیں ہم نے کوئی کمپین نہیں چلائی۔ کچھ یوٹیوبرز بیرون ملک بیٹھ کر صرف شور مچا رہے ہیں۔
انہوں نے کہا کہ لوگ یہ کیوں نہیں دیکھتے کہ وزیر اعظم اور وزیر اعلیٰ پنجاب سرکاری تنخواہیں نہیں لیتے۔ ہم جیسے متوسط طبقے کے لوگ بھی سیاست کرتے ہیں، ہمیں بھی چاہیے کہ سیاست کے ساتھ ساتھ کاروبار بھی کریں۔