ایوانِ صدر میں معرکۂ حق کے ہیروز اور نمایاں شخصیات کو اعلیٰ سول و عسکری اعزازات سے نوازا گیا

ایوانِ صدر میں منعقدہ پروقار تقریب میں صدرِ مملکت آصف علی زرداری نے معرکۂ حق میں بھارت کو شکست دینے اور مختلف شعبوں میں نمایاں خدمات انجام دینے پر سول و عسکری شخصیات کو اعلیٰ اعزازات سے نوازا۔
صدرِ پاکستان نے فیلڈ مارشل اور آرمی چیف عاصم منیر کو شاندار جنگی حکمت عملی اور قیادت پر ہلالِ جرات جبکہ ایئر چیف مارشل ظہیر احمد بابر سدھو کو ہلالِ امتیاز عطا کیا۔ اس موقع پر چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور نیول چیف ایڈمرل نوید اشرف کو نشانِ امتیاز سے نوازا گیا۔
سول اعزازات میں وزیر خارجہ اسحاق ڈار، بلاول بھٹو زرداری، وزیر قانون اعظم نذیر تارڑ، وزیر دفاع خواجہ آصف، مشیر وزیراعظم رانا ثناءاللہ، وزیر داخلہ محسن نقوی، احسن اقبال، شیری رحمان، فیصل سبزواری، مصدق ملک، حنا ربانی کھر، طارق فاطمی اور خرم دستگیر شامل ہیں۔
وفاقی وزیر اطلاعات و نشریات عطاء اللہ تارڑ کو حالیہ پاک بھارت کشیدگی کے دوران قومی بیانیہ عالمی سطح پر مؤثر انداز میں اجاگر کرنے اور بھارتی پروپیگنڈا ناکام بنانے پر نشانِ امتیاز دیا گیا۔
عسکری اعزازات میں ڈی جی آئی ایس آئی لیفٹیننٹ جنرل عاصم ملک کو ستارہ بسالت، جبکہ ڈی جی ملٹری آپریشنز میجر جنرل کاشف عبداللہ، ائیر وائس مارشل محمد اورنگزیب اور رئیر ایڈمرل شہزاد حامد کو تمغہ بسالت سے نوازا گیا۔