لاہور: ایشیا کپ کرکٹ ٹورنامنٹ میں بھارت پاکستان کے خلاف میچ کو بائیکاٹ نہیں کرے گا۔
ایشیا کپ کا میچ پاکستان اور بھارت کے درمیان 14 ستمبر کو کھیلا جائے گا۔ دونوں ٹیمیں ایک ہی گروپ میں شامل ہیں اور سپر فور میں بھی دونوں کا سامنا ہوگا۔ اگر دونوں ٹیمیں فائنل تک پہنچیں تو تیسری بار وہ ایک دوسرے کے مد مقابل آئیں گی۔
حال ہی میں ڈھاکا میں ایشین کرکٹ کونسل کا سالانہ اجلاس ہوا، جس میں ایشیا کپ کے حوالے سے اہم فیصلے کیے گئے۔ ابتدائی طور پر بھارتی کرکٹ بورڈ نے بنگلہ دیش میں اجلاس کے انعقاد پر اعتراض کیا تھا اور آن لائن میٹنگ میں شرکت سے بھی انکار کر دیا تھا، ساتھ ہی ٹورنامنٹ کے بائیکاٹ کا عندیہ بھی دیا تھا۔
تاہم آخرکار بھارتی افسران نے آن لائن میٹنگ میں شرکت کی اور اپنے حکومتی اجازت نامے کے بعد ایشیا کپ میں شرکت کی منظوری دے دی۔ اس پر اے سی سی کے صدر محسن نقوی نے سوشل میڈیا پر ایشیا کپ کے شیڈول کا اعلان کر دیا۔
بھارت میں کچھ حلقوں کی طرف سے پاکستان کے خلاف میچ بائیکاٹ کرنے کی خبریں گردش کر رہی تھیں۔ حال ہی میں سوشل میڈیا پر دباؤ بڑھانے کے باعث سابق کرکٹرز پر مشتمل ٹیم بھارت چیمپئنز کو ورلڈ چیمپئن شپ آف لیجنڈز میں پاکستان چیمپئنز کے بائیکاٹ پر مجبور کیا گیا۔ اسی طرح بھارتی قومی ٹیم پر بھی دباؤ بڑھانے کی کوشش کی گئی، مگر بھارتی کرکٹ بورڈ نے واضح کیا ہے کہ وہ نہ تو ایشیا کپ سے دستبردار ہوگا اور نہ ہی پاکستان کے خلاف میچ کا بائیکاٹ کرے گا۔
بھارتی کرکٹ بورڈ کے قریبی ذرائع کے مطابق بی سی سی آئی اب ٹورنامنٹ سے نکلنے یا میچ بائیکاٹ کرنے کا متحمل نہیں ہو سکتا۔ ایشین کرکٹ کونسل کی میٹنگ میں اس بات پر اتفاق ہو چکا ہے کہ بھارت میزبان ملک ہے اور کوئی تبدیلی نہیں کی جائے گی۔ اعلیٰ سطحی مشاورت کے بعد یہ فیصلہ کیا گیا ہے کہ پاکستان کے خلاف میچ شیڈول کے مطابق کھیلا جائے گا۔
گروپ اے میں پاکستان، بھارت، عمان اور متحدہ عرب امارات کی ٹیمیں شامل ہیں جبکہ گروپ بی میں سری لنکا، بنگلہ دیش، افغانستان اور ہانگ کانگ شامل ہیں۔ ٹورنامنٹ کا آغاز 9 ستمبر سے ہوگا اور فائنل 28 ستمبر کو کھیلا جائے گا۔
دوسری جانب بھارت کے سابق کپتان سارو گنگولی نے بھی پاکستان کے خلاف میچ کی حمایت کی ہے۔ انہوں نے میڈیا سے گفتگو میں کہا کہ دہشت گردی کے خلاف سخت موقف کے باوجود کھیل جاری رہنا چاہیے، اور انہیں ایشیا کپ میں پاکستان کے ساتھ میچ کرنے میں کوئی مسئلہ نہیں۔
