کراچی: پاکستان کرکٹ ٹیم نے ایشیا کپ 2025 کے فائنل کی میچ فیس 7 مئی کو بھارتی جارحیت میں شہید ہونے والے پاکستانی شہریوں کے نام کرنے کا اعلان کیا ہے۔
گزشتہ روز دبئی میں کھیلے گئے سنسنی خیز فائنل میں بھارت نے پاکستان کو آخری اوور میں 5 وکٹوں سے شکست دی، تاہم جیت کے باوجود بھارتی ٹیم نے چیئرمین ایشین کرکٹ کونسل محسن نقوی سے ٹرافی وصول کرنے سے انکار کر دیا، جس کے باعث تقریب ٹرافی کے بغیر اختتام پذیر ہوئی۔
بھارتی کپتان سوریا کمار یادیو، جو اس سے قبل سیاسی بیانات پر جرمانے کا سامنا کر چکے ہیں، نے میچ کے بعد ایک مرتبہ پھر اعلان کیا کہ وہ اپنی فائنل فیس بھارتی فوج کو عطیہ کریں گے۔
دوسری جانب پاکستان کرکٹ بورڈ (پی سی بی) نے اپنے سوشل میڈیا پیغام میں کہا کہ قومی کھلاڑی اپنی میچ فیس 7 مئی کے بھارتی حملے میں شہید ہونے والے بچوں اور عام شہریوں کے نام کرتے ہیں۔
یاد رہے کہ 7 مئی کو بھارت کی جانب سے پاکستان پر میزائل حملے میں کئی بے گناہ شہری شہید ہوئے تھے، جس کے بعد پاکستان نے بھرپور جوابی کارروائی کرتے ہوئے دشمن کے 7 طیارے مار گرائے اور متعدد ائیربیسز کو نشانہ بنایا۔ بعد ازاں امریکا کی مداخلت سے جنگ بندی ممکن ہوئی۔