تہران: ایران نے ایک اور اہم دعویٰ کرتے ہوئے کہا ہے کہ اس کے فضائی دفاعی نظام نے اسرائیل کا پانچواں ایف-35 اسٹیلتھ لڑاکا طیارہ تباہ کر دیا ہے۔ ایرانی حکام کے مطابق یہ کارروائی ورامین کے نزدیک انجام دی گئی، جو تہران کے جنوب مشرقی علاقے میں واقع ہے۔
مقامی میڈیا ذرائع، جن میں مہر نیوز ایجنسی اور ارنا شامل ہیں، کے مطابق صوبائی گورنر حسین عباسی نے بتایا کہ یہ جدید اسرائیلی طیارہ ایران کے دفاعی میزائل سسٹم کی مدد سے نشانہ بنایا گیا۔
واضح رہے کہ ایران پہلے ہی دعویٰ کر چکا ہے کہ اسرائیلی فضائی کارروائیوں کے آغاز کے بعد سے اب تک اس کے دفاعی نظام نے پانچ ایف-35 طیارے گرا دیے ہیں۔ ایرانی میڈیا کا کہنا ہے کہ یہ کامیابیاں ملکی دفاعی ٹیکنالوجی اور ہائی الرٹ سسٹمز کی مؤثر کارکردگی کی مظہر ہیں۔
دفاعی ماہرین کا ماننا ہے کہ ایف-35 دنیا کے سب سے جدید اور مہنگے جنگی طیاروں میں سے ایک ہے، جسے مار گرانا انتہائی مشکل ہوتا ہے۔ ایران کا حالیہ دعویٰ خطے میں جاری کشیدگی کو مزید سنگین کر سکتا ہے، جبکہ اسرائیلی حکومت کی جانب سے تاحال اس پر کوئی ردعمل سامنے نہیں آیا۔
