تہران: ایران کے نائب وزیر خارجہ نے امریکا کو سخت الفاظ میں متنبہ کیا ہے کہ اگر اس نے اسرائیل کی حمایت میں ایران کے خلاف کسی بھی قسم کی مداخلت کی، تو تہران اپنی بھرپور طاقت سے جواب دے گا۔
ایرانی سرکاری میڈیا کے مطابق نائب وزیر خارجہ کاظم غریب آبادی نے کہا کہ ایران اپنی خودمختاری اور قومی سلامتی کے دفاع کے لیے ہر ممکن آپشن پر عمل کرنے کے لیے تیار ہے۔ انہوں نے خبردار کیا کہ اگر امریکا اسرائیل کی جارحیت کو نہیں روک سکتا، تو کم از کم غیر جانبدار رہے۔
کاظم غریب آبادی کا کہنا تھا کہ “اگر واشنگٹن نے اسرائیلی حملوں کا ساتھ دینے کا فیصلہ کیا، تو ایران کو اپنے دفاع کے لیے طاقت کا استعمال کرنا پڑے گا اور دشمنوں کو منہ توڑ جواب دیا جائے گا۔”
انہوں نے مزید کہا کہ ایران کے فوجی ادارے کسی بھی ممکنہ صورتحال سے نمٹنے کے لیے مکمل طور پر تیار اور چوکس ہیں، اور تمام آپشنز ان کے سامنے موجود ہیں۔
