ایرانی جوہری تنصیبات پر اسرائیلی حملوں کے بعد خطے میں کشیدگی شدید ہوگئی ہے۔ اسرائیلی میڈیا کے مطابق، ایران نے جوابی کارروائی کرتے ہوئے اسرائیل کی جانب 100 سے زائد ڈرونز روانہ کیے ہیں۔
اسرائیلی فوج کے ترجمان کا کہنا ہے کہ اسرائیل ان ایرانی ڈرونز کو شام کی فضائی حدود میں ہی ناکارہ بنانے کی کوشش کر رہا ہے، تاہم ان کا کہنا تھا کہ اگلے چند گھنٹے اسرائیل کے لیے نہایت مشکل ہوں گے۔
ایران کی ممکنہ جوابی کارروائی کے پیش نظر اسرائیل میں ہنگامی اقدامات کیے جا رہے ہیں۔ اسرائیلی ائیرلائنز نے بن گورین ائیرپورٹ سے اپنے تمام طیارے دیگر مقامات پر منتقل کر دیے ہیں، جس کے بعد ائیرپورٹ تقریباً طیاروں سے خالی ہو چکا ہے۔
ادھر سیکیورٹی خدشات کے باعث ایران اور عراق نے اپنی فضائی حدود بند کر دی ہیں، جبکہ اردن نے بھی تمام پروازوں کے لیے اپنی فضائی حدود کو عارضی طور پر بند کر دیا ہے۔
ماہرین کے مطابق یہ صورت حال مشرقِ وسطیٰ میں ایک نئے اور ممکنہ طور پر خطرناک تنازعے کی جانب اشارہ کر رہی ہے، جس کے اثرات عالمی سطح پر بھی مرتب ہو سکتے ہیں۔