اسرائیلی ایئرپورٹس پر لینڈنگ اور ٹیک آف بدستور معطل، بیرون ملک پھنسے شہریوں کی واپسی کے لیے کوششیں جاری
اسرائیل کی ایئرپورٹس اتھارٹی نے اعلان کیا ہے کہ بن گوریون انٹرنیشنل ایئرپورٹ پر طیاروں کی آمدورفت پر عائد پابندیاں تیسرے روز بھی برقرار رہیں گی۔
حکام کا کہنا ہے کہ ملکی ایئر لائنز کے تعاون سے بیرون ملک پھنسے ہوئے اسرائیلی شہریوں کی واپسی کے لیے اقدامات کیے جا رہے ہیں، تاہم یہ پروازیں سیکورٹی صورتحال میں بہتری سے مشروط ہوں گی۔
اتھارٹی کے مطابق، “تمام عملہ اور طیارے ہمہ وقت تیار ہیں، لیکن پروازوں کا آغاز صرف اسی وقت کیا جائے گا جب حالات مکمل طور پر محفوظ ہوں گے۔”
تاحال فلائٹ آپریشن کی بحالی کا کوئی حتمی وقت طے نہیں کیا گیا ہے، اور فیصلہ موجودہ حالات کے جائزے کے بعد ہی ہوگا۔
دوسری جانب، اسرائیلی حکام نے تصدیق کی ہے کہ اردن اور مصر کے ساتھ ملحقہ زمینی سرحدیں بدستور کھلی ہوئی ہیں تاکہ شہریوں کی آمدورفت ممکن بنائی جا سکے۔
ادھر ایران نے بھی اپنی فضائی حدود کی بندش میں توسیع کرتے ہوئے اسے مقامی وقت کے مطابق آج سہ پہر 3 بجے تک بڑھا دیا ہے۔
