اسلام آباد: ایران اور اسرائیل کے درمیان جاری جنگ کے دوران ایران میں پھنسے 450 پاکستانی زائرین کو بحفاظت نکال لیا گیا ہے۔
نائب وزیراعظم اسحاق ڈار نے سماجی رابطے کی ویب سائٹ ایکس پر بتایا کہ موجودہ علاقائی کشیدگی کے پیش نظر حکومت پاکستان اپنے شہریوں کی حفاظت اور بہبود کے لیے تمام ممکنہ اقدامات کر رہی ہے۔ ان کے مطابق، ایران سے 450 زائرین کے انخلا کا عمل مکمل ہو چکا ہے جبکہ ایران میں مقیم پاکستانی طلباء کے انخلا کے لیے بھی عملی اقدامات کیے جا رہے ہیں، جس کے پہلے مرحلے میں 154 طلباء کو نکالا جائے گا۔
اسحاق ڈار نے مزید بتایا کہ عراق میں موجود پاکستانی زائرین، جو فضائی حدود کی بندش کے باعث پھنسے ہوئے ہیں، ان کے لیے بھی ایران میں پاکستانی سفارت خانہ مسلسل رابطے میں ہے اور ان کی محفوظ رہائش و انخلا کے لیے اقدامات کیے جا رہے ہیں۔
انہوں نے کہا کہ دفتر خارجہ میں قائم کرائسز مینجمنٹ یونٹ (CMU) چوبیس گھنٹے فعال ہے تاکہ کسی بھی ہنگامی صورتحال میں مدد فراہم کی جا سکے۔
نائب وزیراعظم کے مطابق، خطے میں موجود تمام پاکستانی سفارت خانے شہریوں اور زائرین کی حفاظت و انخلا کی نگرانی کر رہے ہیں۔
