تہران: ایران اور اسرائیل کے درمیان 12 روزہ جنگ کے دوران شہید ہونے والے ایرانی شہریوں کی تعداد 900 سے تجاوز کرگئی ہے۔
غیر ملکی خبر رساں ادارے نے ایرانی سرکاری میڈیا کے حوالے سے بتایا ہے کہ ان جھڑپوں کے دوران اب تک کم از کم 935 افراد جان کی بازی ہار چکے ہیں، جن میں 132 خواتین اور 38 بچے بھی شامل ہیں۔
واضح رہے کہ اسرائیل نے 13 جون کو ایران پر حملے شروع کیے تھے، جن میں ایرانی فوج کے سینئر افسران اور جوہری سائنسدانوں کو نشانہ بنایا گیا۔
جوابی کارروائی میں ایران نے اسرائیلی علاقوں پر شدید میزائل حملے کیے، جن کے نتیجے میں اسرائیل میں 28 افراد ہلاک ہوئے۔
اس تنازعے کے دوران امریکا نے بھی ایران کے مختلف جوہری مراکز جن میں فردو، اصفہان اور نطنز شامل ہیں، پر فضائی حملے کیے اور ان تنصیبات کو مکمل تباہ کرنے کا دعویٰ کیا۔
یہ جھڑپیں 24 جون کو ایران اور اسرائیل کے درمیان ہونے والی جنگ بندی کے بعد رُک گئیں۔
