اسلام آباد: وفاقی وزیر داخلہ محسن نقوی اور ایران کے وزیر داخلہ سکندر مومنی کے درمیان ٹیلیفونک رابطہ ہوا، جس میں ایرانی ہم منصب نے حالیہ طوفانی بارشوں اور سیلاب سے ہونے والی تباہ کاریوں پر افسوس کا اظہار کرتے ہوئے متاثرین کی مدد کے لیے تعاون کی پیشکش کی۔
ایرانی وزیر داخلہ نے خیبرپختونخوا اور گلگت بلتستان میں شدید بارشوں اور سیلاب کے باعث قیمتی جانوں کے ضیاع پر گہرے دکھ کا اظہار کیا اور جاں بحق افراد کے لواحقین سے دلی ہمدردی کا اظہار کرتے ہوئے صبر جمیل کی دعا کی۔
سکندر مومنی نے کہا کہ پاکستان ایک قریبی برادر ملک ہے اور آزمائش کی اس گھڑی میں ایران ہر ممکن مدد کے لیے تیار ہے۔ انہوں نے کہا کہ سیلاب سے ہونے والی تباہ کاریاں دیکھ کر دکھ ہوا ہے، جن میں درجنوں افراد اپنے پیاروں سے بچھڑ گئے۔ ایران پاکستانی عوام کے ساتھ مکمل یکجہتی کے ساتھ کھڑا ہے۔
محسن نقوی نے ایرانی وزیر داخلہ کی ہمدردی اور مدد کی پیشکش پر ان کا شکریہ ادا کرتے ہوئے کہا کہ ایران اور پاکستان کے درمیان تعلقات صرف ہمسائیگی پر مبنی نہیں بلکہ دکھ سکھ کے ساجھے دار ہیں۔ انہوں نے مزید کہا کہ پاکستان اس وقت شدید موسمیاتی تبدیلیوں کا سامنا کر رہا ہے، جو تاریخ کی بدترین تباہی کا باعث بن رہی ہیں۔
وفاقی وزیر داخلہ کا کہنا تھا کہ تمام متعلقہ ادارے سیلاب متاثرین کی مدد کے لیے سرگرم عمل ہیں، اور ان کی بحالی و ریلیف حکومت کی اولین ترجیح ہے۔
