استنبول: اسلامی تعاون تنظیم (او آئی سی) کے وزرائے خارجہ کونسل کے 51ویں اجلاس کا مشترکہ اعلامیہ جاری کر دیا گیا۔
اعلامیے میں مسلم امہ کے اتحاد اور یکجہتی کو مزید مضبوط بنانے کے عزم کا اعادہ کیا گیا، جب کہ اسلاموفوبیا کی شدید مذمت کرتے ہوئے عالمی برادری سے مؤثر اقدامات کا مطالبہ کیا گیا۔
او آئی سی نے کشمیری عوام کے حق خودارادیت کی غیر متزلزل حمایت کی یقین دہانی کراتے ہوئے عالمی نظام میں مسلم دنیا کی مؤثر نمائندگی بڑھانے پر زور دیا۔
اعلامیے میں فلسطین کے مسئلے کو تنظیم کا مرکزی ایجنڈا قرار دیتے ہوئے مشرقی یروشلم کو فلسطینی ریاست کا دارالحکومت تسلیم کرنے کی مکمل حمایت کا اعادہ کیا گیا۔
اسرائیلی جارحیت کی سخت مذمت کرتے ہوئے غزہ میں جاری قتل عام کو نسل کشی قرار دیا گیا اور فلسطینیوں کے جبری انخلاء کی تمام منصوبہ بندیوں کو مسترد کر دیا گیا۔
