شیفیلڈ (برطانیہ): برطانیہ کے شہر شیفیلڈ میں ایک برٹش پاکستانی ریسٹورنٹ پر ہندو انتہا پسندوں کے حملے کا واقعہ پیش آیا۔ حملے میں ریسٹورنٹ میں توڑپھوڑ کی گئی اور عملے کو ہراساں کیا گیا۔
ریسٹورنٹ کے مالک، رحیم اللہ خان، نے کہا کہ حملہ آور بھارتی شہری نشے میں تھے۔ انہوں نے کھانے کے بعد دعویٰ کیا کہ بھیڑ کے گوشت میں گائے کا گوشت شامل کیا گیا ہے، اور کاؤنٹر پر شور مچایا۔
رحیم اللہ کے مطابق، حملہ آوروں نے شیشے اور دیگر اشیاء کو نقصان پہنچایا۔ ریسٹورنٹ انتظامیہ نے واضح کیا کہ ان کے مینیو میں بیف شامل ہی نہیں ہے، لیکن نشے میں دھت افراد نے ورکرز پر حملہ کر دیا۔
واقعے کے بعد، برطانوی پولیس نے ملزمان کو گرفتار کر لیا ہے اور شیفیلڈ ریسٹورنٹ کے اس واقعے کی مزید تحقیقات جاری ہیں۔ اس واقعے کو مذہبی تعصب کے تناظر میں دیکھا جا رہا ہے اور برطانوی پاکستانی کمیونٹی میں غم و غصے کی لہر دوڑ گئی ہے۔