اسلام آباد: انسداد دہشت گردی کی عدالت نے پی ٹی آئی کے سینئر رہنما کے خلاف قابل ضمانت وارنٹ گرفتاری جاری کر دیے ہیں۔
یہ فیصلہ 4 اکتوبر کو ہونے والے احتجاج کے حوالے سے درج مقدمات کی سماعت کے دوران سنایا گیا۔ کیس کی سماعت انسداد دہشت گردی عدالت اسلام آباد کے جج طاہر عباس سپرا نے کی۔
سماعت کے دوران عدالت نے قومی اسمبلی میں قائد حزب اختلاف عمر ایوب کے قابل ضمانت وارنٹ جاری کیے جبکہ سینیٹر اعظم سواتی کو حاضری سے استثنا دے دیا گیا۔
عدالت نے غیر حاضر رہنماؤں کے ضمانتی مچلکے ضبط کرنے کا حکم بھی جاری کرتے ہوئے کیس کی مزید سماعت 30 جولائی تک ملتوی کر دی۔
یاد رہے کہ یہ مقدمہ تھانہ شہزاد ٹاؤن میں 4 اکتوبر کے احتجاج کے سلسلے میں درج کیا گیا تھا، جس کی سماعت کے موقع پر پی ٹی آئی کے متعدد کارکنان بشمول ایڈووکیٹ سردار محمد مصروف خان، زاہد بشیر ڈار اور دیگر عدالت میں پیش ہوئے۔
