امریکا نے پاکستان کے ساتھ تجارتی معاہدہ مکمل کرلیا، توانائی کے شعبے میں تعاون کا اعلان

واشنگٹن: پاکستان اور امریکا کے تعلقات میں اہم پیش رفت سامنے آئی ہے، جب امریکی صدر ڈونلڈ ٹرمپ نے اعلان کیا کہ دونوں ممالک کے درمیان تجارتی معاہدہ مکمل ہو چکا ہے۔
صدر ٹرمپ نے سوشل میڈیا پر جاری اپنے بیان میں کہا کہ پاکستان کے ساتھ ٹریڈ ڈیل کو حتمی شکل دے دی گئی ہے، اور اب دونوں ممالک توانائی کے شعبے میں، بالخصوص تیل کی تنصیبات کی ترقی کے لیے مشترکہ تعاون کریں گے۔ انہوں نے مزید بتایا کہ ایک امریکی آئل کمپنی کے انتخاب کا عمل جاری ہے جو اس اشتراک کی قیادت کرے گی۔
صدر ٹرمپ نے مستقبل کی جھلک پیش کرتے ہوئے کہا کہ ایک وقت ایسا بھی آ سکتا ہے جب پاکستان، بھارت کو تیل برآمد کرتا ہوا دکھائی دے۔
دفاعی و اقتصادی ماہرین اس معاہدے کو پاکستان کی معیشت کے لیے مثبت قدم اور خطے میں توانائی کے توازن میں ممکنہ تبدیلی کا باعث قرار دے رہے ہیں۔
واضح رہے کہ حالیہ دنوں میں صدر ٹرمپ نے بھارت پر شدید تنقید کرتے ہوئے اس پر 25 فیصد ٹیرف اور اضافی جرمانے عائد کرنے کا اعلان کیا تھا، جس کے بعد اس پاک-امریکا معاہدے کو خطے میں تجارتی توازن کے نئے دور کا آغاز سمجھا جا رہا ہے۔