اسلام آباد: نائب وزیر اعظم اور وزیر خارجہ سینیٹر اسحاق ڈار آئندہ ہفتے امریکہ روانہ ہوں گے، جہاں وہ نیویارک میں اقوام متحدہ کی سلامتی کونسل کی صدارت سے متعلق اعلیٰ سطح تقاریب میں شرکت کریں گے۔
دفتر خارجہ کے مطابق، اس دورے میں پاکستان کی کثیرالجہتی سفارت کاری کو اجاگر کیا جائے گا۔ اسحاق ڈار اقوام متحدہ میں “کثیر جہتی اقدامات کے ذریعے عالمی امن و سلامتی کے فروغ” کے موضوع پر ایک اہم مباحثے کی صدارت کریں گے، جہاں سفارتی حکمتِ عملی، ثالثی اور عالمی تعاون کے فروغ پر تبادلہ خیال کیا جائے گا۔
اس کے علاوہ، وہ سلامتی کونسل کے سہ ماہی اجلاس کی صدارت کریں گے، جس میں مشرقِ وسطیٰ بالخصوص فلسطین کی صورت حال زیر غور آئے گی۔
اسحاق ڈار ایک اور اہم بریفنگ کی بھی صدارت کریں گے، جس کا مقصد اقوام متحدہ اور اسلامی تعاون تنظیم (OIC) کے درمیان روابط کو مضبوط کرنا ہے۔ یہ بریفنگ پاکستان کی کوششوں کا حصہ ہے تاکہ اسلامی دنیا کا عالمی امن میں مؤثر کردار اجاگر ہو۔
اس دورے کے دوران وزیر خارجہ فلسطینی عوام کے حقِ خودارادیت اور دو ریاستی حل کی حمایت میں منعقدہ بین الاقوامی کانفرنس میں بھی شرکت کریں گے، جہاں پاکستان کی فلسطینی کاز کے ساتھ غیر متزلزل حمایت کا اعادہ کیا جائے گا۔
نیویارک میں قیام کے دوران وزیر خارجہ کی اقوام متحدہ کے اعلیٰ حکام اور دیگر ممالک کے وزرائے خارجہ سے اہم دوطرفہ ملاقاتیں بھی طے ہیں۔ دفتر خارجہ کا کہنا ہے کہ یہ دورہ اقوام متحدہ میں پاکستان کی متحرک سفارت کاری اور عالمی سطح پر امن و انصاف کے عزم کی بھرپور عکاسی کرتا ہے۔
