اعظم سواتی بیرون ملک روانگی کے لیے آزاد، نام اسٹاپ لسٹ سے ہٹانے کی ایف آئی اے یقین دہانی

پشاور: ہائیکورٹ نے سینیٹر اعظم سواتی کا نام ایگزٹ کنٹرول لسٹ (ای سی ایل) اور پاسپورٹ کنٹرول لسٹ (پی سی ایل) سے نکالنے کی درخواست منظور کر کے کیس نمٹا دیا ہے۔
درخواست کی سماعت ڈویژن بینچ جسٹس سید ارشد علی اور جسٹس ڈاکٹر خورشید اقبال نے کی۔ درخواست گزار کے وکیل علی عظیم آفریدی نے عدالت کو بتایا کہ اعظم سواتی کا 13 اگست کو صبح 9 بجے بیرون ملک روانگی کا شیڈول ہے، مگر ان کے نام شامل ہونے کی وجہ سے وہ سفر نہیں کر پا رہے تھے۔
عدالت کو بتایا گیا کہ عدالت کے نام نکالنے کے حکم کے باوجود انہیں ایئرپورٹ پر جانے کی اجازت نہیں دی گئی۔ سماعت کے دوران اسسٹنٹ اٹارنی جنرل نے کہا کہ اعظم سواتی کا نام اب کسی فہرست میں نہیں ہے اور انہیں سفر کی مکمل اجازت ہے۔ ایف آئی اے کے نمائندے نے بھی عدالت کو یقین دلایا کہ اعظم سواتی اب بیرون ملک جا سکتے ہیں۔ عدالت نے یہ سن کر درخواست نمٹا دی۔