اسلام آباد:نائب وزیراعظم اور وزیر خارجہ اسحاق ڈار نے کہا ہے کہ عالمی و علاقائی معاملات پر پاکستان اور ترکیے کا مؤقف یکساں ہے۔
اسلام آباد میں ترک وزیر خارجہ حاقان فیدان کے ساتھ مشترکہ پریس کانفرنس کرتے ہوئے اسحاق ڈار نے کہا کہ پاکستان ترکیے کے مختلف شعبوں میں تجربات سے فائدہ اٹھا رہا ہے، دونوں برادر ممالک کے درمیان تعلقات وقت کے ساتھ مزید مضبوط ہو رہے ہیں۔
انہوں نے بتایا کہ پاک ترک اعلیٰ سطحی دفاعی کمیٹیوں کا اجلاس آئندہ ستمبر میں منعقد ہوگا، جس میں تعاون کے مزید مواقع پر بات چیت ہوگی۔
اس موقع پر ترک وزیر خارجہ حاقان فیدان نے کہا کہ دونوں ممالک اپنے تعلقات کو مضبوط ادارہ جاتی شراکت داری میں بدلنے کے لیے پرعزم ہیں۔
انہوں نے کہا کہ پاکستان اور ترکیے نے معیشت، ثقافت اور دفاع سمیت مختلف شعبوں میں تعاون کو فروغ دیا ہے، اور دونوں ملک باہمی تجارت کو 5 ارب ڈالر تک بڑھانے کے خواہشمند ہیں۔
