اب آپ اے آئی ڈوگ پال سکتے ہیں

جدید ٹیکنالوجی نے ایک اور میدان میں قدم رکھ دیا ہے، جہاں اب حقیقی پالتو کتوں کی جگہ مصنوعی ذہانت (اے آئی) سے لیس روبوٹس لے سکتے ہیں۔ چین میں ایک ایسا انوکھا اے آئی ڈوگ تیار کیا گیا ہے جسے نوجوانوں کو تنہائی اور سماجی انزائٹی سے نجات دلانے کے لیے ڈیزائن کیا گیا ہے۔

یہ اے آئی روبوٹ، جس کا نام بو بو (BooBoo) ہے، ہوانگزو جین مور ٹیکنالوجی کمپنی نے تیار کیا ہے۔ یہ روبوٹ صارفین کے ساتھ بات چیت کے لیے جدید اے آئی ٹیکنالوجی کا استعمال کرتا ہے، اور ایک بو بو کی قیمت تقریباً 190 ڈالرز رکھی گئی ہے۔

کمپنی کے مطابق، اب تک ایک ہزار سے زائد بو بو روبوٹس فروخت ہو چکے ہیں۔ یہ روبوٹ نوجوانوں کو نہ صرف ایک دوست کا احساس دیتے ہیں بلکہ انہیں سماجی تعلقات بہتر بنانے میں بھی مدد فراہم کرتے ہیں۔

بو بو کو خاص طور پر ان لوگوں کے لیے تیار کیا گیا ہے جو حقیقی پالتو جانور نہیں رکھ سکتے یا جنہیں جانوروں کی دیکھ بھال کے مسائل کا سامنا ہوتا ہے۔ تاہم، یہ سوال ابھی باقی ہے کہ آیا اے آئی سے لیس یہ روبوٹ حقیقی پالتو کتوں کا نعم البدل بن سکتے ہیں یا نہیں۔

ماہرین کا کہنا ہے کہ اے آئی ڈوگ جیسے روبوٹس پالتو جانور رکھنے کے تجربے کو بدل سکتے ہیں، لیکن حقیقی جانوروں کی فطری محبت اور انسیت کو مکمل طور پر نقل کرنا شاید ممکن نہ ہو۔