کیا آپ بھی ہر صبح 100 فیصد چارج شدہ فون کے ساتھ دن کا آغاز کرتے ہیں؟ اگر ہاں، تو یہ جان لیں کہ آپ کی یہ عام عادت دراصل فون کی بیٹری کے لیے زہرِ قاتل ثابت ہو رہی ہے۔ اسمارٹ فونز کی بیٹری جلدی خراب ہونے کی ایک بڑی وجہ یہی ہے کہ لوگ ہر بار اسے مکمل چارج کر لیتے ہیں، خاص طور پر رات بھر چارجنگ پر چھوڑنا طویل مدتی طور پر بیٹری کی زندگی کو شدید نقصان پہنچا سکتا ہے۔
اسمارٹ فون بنانے والی بڑی کمپنیاں بارہا یہ ہدایات دیتی آئی ہیں کہ فون کو زیادہ دیر چارج پر نہ چھوڑا جائے اور اسے 30 سے 70 فیصد کے درمیان چارج کرنا بہتر ہوتا ہے۔ لیکن بہت سے لوگ اس مشورے کو نظر انداز کر دیتے ہیں اور صبح اٹھ کر اپنے فون کو 100 فیصد چارج دیکھ کر مطمئن ہو جاتے ہیں، حالانکہ درحقیقت وہ اپنی بیٹری کی عمر کو خود کم کر رہے ہوتے ہیں۔
ماہرین کے مطابق جب بیٹری مکمل چارج ہو جاتی ہے، لیکن چارجر بدستور لگا رہتا ہے، تو اضافی وولٹیج کی وجہ سے بیٹری کی کیمیائی ساخت متاثر ہونے لگتی ہے۔ وقت کے ساتھ، یہ اثرات نمایاں ہو جاتے ہیں اور بیٹری کی کارکردگی کم ہوتی جاتی ہے۔ کچھ تحقیق کے مطابق، بار بار 100 فیصد چارج کرنے کی عادت بیٹری کی عمر کو 10 سے 15 فیصد کم کر سکتی ہے، جس کا مطلب یہ ہے کہ آپ کا فون پہلے سے کہیں جلدی چارج ختم کرنے لگے گا۔
لیتھیئم آئن بیٹریز، جو آج کل تقریباً تمام جدید اسمارٹ فونز میں استعمال ہو رہی ہیں، قدرتی طور پر وقت کے ساتھ کمزور ہو جاتی ہیں، لیکن اگر ان کے ساتھ درست طریقہ اپنایا جائے، تو ان کی عمر کو بڑھایا جا سکتا ہے۔ ماہرین مشورہ دیتے ہیں کہ فون کی بیٹری کو 20 سے 80 فیصد کے درمیان چارج کرنا زیادہ بہتر ہوتا ہے کیونکہ اس سے بیٹری پر غیر ضروری دباؤ نہیں پڑتا۔
اسی طرح، فون کو ہر بار 0 فیصد پر لا کر چارج کرنا بھی نقصان دہ ہوتا ہے۔ جب بیٹری مکمل طور پر ختم ہو جاتی ہے، تو اس کے اندر چارجنگ سائیکل پر مزید دباؤ پڑتا ہے، جس سے اس کی کارکردگی تیزی سے گرنے لگتی ہے۔
ایپل اور سام سنگ جیسی بڑی کمپنیوں نے اب ایسے فیچرز متعارف کروا دیے ہیں، جو صارفین کو بیٹری کے بہتر استعمال میں مدد دیتے ہیں۔ آئی فون میں ایک “بیٹری چارجنگ آپٹیمائزیشن” کا فیچر شامل کیا گیا ہے، جو بیٹری کو مکمل چارج ہونے سے پہلے ہی چارجنگ کی رفتار کم کر دیتا ہے تاکہ بیٹری کی زندگی کو طول دیا جا سکے۔ سام سنگ سمیت دیگر کئی کمپنیوں کے فونز میں بھی “Adaptive Charging” جیسے فیچرز موجود ہیں، جو بیٹری کو غیر ضروری تناؤ سے بچاتے ہیں۔
اگر آپ چاہتے ہیں کہ آپ کی اسمارٹ فون بیٹری زیادہ عرصہ چلے، تو سب سے پہلے رات بھر چارجنگ کی عادت کو ترک کریں اور کوشش کریں کہ فون کو ہر وقت مکمل چارج کرنے کے بجائے 70 سے 80 فیصد تک چارج کر کے استعمال کریں۔ اس معمولی سی تبدیلی سے آپ کی بیٹری کی عمر میں نمایاں اضافہ ہوسکتا ہے اور آپ کو جلد نئی بیٹری یا نیا فون خریدنے کی ضرورت نہیں پڑے گی۔
