ٹک ٹاک ویڈیو دیکھ کر ملتان سے کراچی فریج لینے کے لئے آنے والے کو سی ویو جانا مہنگا پڑ گیا

ملتان سے تعلق رکھنے والا ایک شہری، جو فریج خریدنے کے لیے کراچی آیا تھا، سی ویو پر دھوکہ دہی کا شکار ہوگیا۔ متاثرہ شہری عمران نے بتایا کہ اس نے کینٹ اسٹیشن سے شیرشاہ جانے کے لیے ایک آف لائن بائیک رائیڈر کی خدمات حاصل کیں۔ شیرشاہ مارکیٹ بند ہونے پر، وہ اسی بائیک رائیڈر کے ساتھ کورنگی میں اپنے رشتہ داروں کے گھر جانے لگا۔
راستے میں جب وہ کلفٹن کے ساحل پر پہنچے تو عمران نے سمندر دیکھنے کی خواہش ظاہر کی۔ سمندر میں جانے سے پہلے اس نے اپنی قمیض، چپل اور دیگر سامان بائیک رائیڈر کے سپرد کر دیا۔ تاہم، جب وہ پانی سے واپس آیا تو بائیک رائیڈر غائب تھا۔
متاثرہ شخص کا کہنا ہے کہ اس کی قمیض کی جیب میں 40 ہزار روپے نقدی، موبائل فون، شناختی کارڈ اور دیگر اہم اشیاء تھیں۔ بائیک رائیڈر سب کچھ لے کر فرار ہوگیا۔
عمران بغیر قمیض اور ننگے پاؤں قریبی پولیس چوکی سی ویو پہنچا، جہاں اس نے واقعے کی رپورٹ درج کروائی۔ پولیس کا کہنا ہے کہ شکایت موصول کر لی گئی ہے اور ملزم کی تلاش جاری ہے۔