کراچی: دریائے سندھ سے چھ کینالز نکالنے کے منصوبے کے خلاف پیپلز پارٹی کے کارکنوں نے سندھ بھر میں مظاہرے کیے۔
رپورٹس کے مطابق پیپلز پارٹی کارکنوں نے لاڑکانہ، بدین، نواب شاہ، گھوٹکی، جیکب آباد، کندھ کوٹ، نوشہروفیروز، تھرپارکر، جامشورو اور دیگر شہروں میں احتجاجی مظاہرے کیے، جن میں پارٹی کی ضلعی قیادت اور ارکان اسمبلی نے بھی شرکت کی۔
دوسری جانب قوم پرست جماعتوں نے بھی اس منصوبے کے خلاف احتجاج جاری رکھا ہوا ہے۔ عوامی تحریک نے نوشہرو فیروز میں مظاہرہ کرتے ہوئے دریائے سندھ سے کینالز نکالنے کو صوبے کی زراعت کے خلاف سازش قرار دیا۔
مظاہرین کا کہنا تھا کہ اس منصوبے سے سندھ میں پانی کا بحران شدت اختیار کر جائے گا اور زراعت شدید متاثر ہوگی۔
